Нилъеда ракIалда ругогури 90 абилел соназда багIараб пиджак ретIарал ва габуниб рахас барал чагIаца партиялъул нухмалъиги хъамун, тахбакIал ккураб къагIида. Гьез рекIарал машинабахъ ва ретIараб ратIлихъ балагьун рукIарал школлъималаца тIехь нахъе реххана, библиотекалде нух кIочана, тIахьал цIалъи инвалидазул, я бикъизе, я бахъизе чIаголъи гьечIел пакъирзабазул ишлъун тана. ГIезегIан халат бахъараб заманалда гьедин букIинеги букIана, жакъаги хутIун руго гьелъул гIаламатал. Нухмалъиялда къанагIат рихьизе щола, гIурусаца абухъе "лица обезображенные интеллектом".
Республикаялъул нухмалъиялде кадраби гIезарулеб къебелъилъун лъугьана спорталъул залал, базаралгун вокзалал, къватI, криминал гIезабулел питомникал. Иргадулав гугариялъул, яги боксалъул чемпионасе бегьулеб гIадаб тахбакI балагьулев вукIунаан МухIамадгIали, цощинав гьев аскаргун ХъахIаб рокъове вачIинадаян. Мунагьал чураяв ГъалбацIовас бицунаан, ТIануси годекIаниб цо херас гьикъун бугила щал гьанже хъулухъазда толел ругел гъора ГIанжиялда абун. РечIчIухъаби толел руго киналгоян шагьаралдаса вачIарас абидал херав гьиманила.
- Гьии ... къохьол дуниял... энибейищха алъул хIал ккараб? РечIчIухъаби рукIунаан церего бечедал чагIаца жидеего рекIелгъеялъе рагъизе тIамулел гIадамал. КинабгIаги батIияб тIокIлъи гьечIого, гугаризе бергьулес къолесда тIад нухмалъи гьабулеб батани гьеб кколеб бугоха гIалхул замана, иш лъикI рагIуларо, аб роцIцIине сонал къварегIуна... - ян абун буго херас. Гьеб хабар ккун букIун батила гьанжеялдаса I0 соналъ цебе. БитIараб бицани дица гьеб хабар тIубанго гIаданибе биччан букIинчIо.
Дагьаб цебегIан информалатаца кьураб цо цIияб хабар цIалигун ботIронир ххенана церего рагIарал гьадал херасул рагIаби. "Сумма" компаниялъул президент Зиявудин МухIамадовас квержубараб рагъул Fight Nights проумотеразул компаниялъул акциял росанин хъван бугоан. Дица хIисаб гьабуна бачIанагури дов ТIанусиса херас абураб бечедас чвантинир квералги лъун рекIелгъеялъе гIадамал рагъизе тIамулеб замана абун. Хисанагури приоритетал, гьев рагъухъанасейищ бигьа букIинеб жакъа хъулухъ босизе, я рагъухъан гурев, яги гугарухъан гурев Зиявудин МухIамадовсейищ? Жакъа Дагъистаналда кIудияб политикияб асар бугел церехъаби Зиявудин МухIамадовги Сулейман Керимовги руго лъикIаб базовияб профессионалияб лъай щварал чагIи. Зиявудиница МахIахъалаялъул I3 абилеб школаги, МГУялъул экономикияб факультетги лъугIизабуна тIокIлъиялда.
Миллиардаз долларал данде гьаризе ва халкъазда гьоркьосеб финансовияб политикаялъулъ асар букIине ккани дагьа-макъаб лъаялъ иш гьабуларо. Хасго кIудияб лъугьа-бахъинлъун рикIкIине бегьула Дагъистаналъул рухIияб гIумруялъулъ жакъа бачIараб цIияб, роххалилаб хабар.
Дагъистаналъул муфтий ва устар АхIмадхIажи ГIабдулаевас официалияб къагIидаялъ лъазабуна МахIачхъалаялда аскIоб базе байбихьараб 50 азарго чи жанив унеб цIияб мажгит ва Исламалъул центр базе тIаде босанин Зиявудин МухIамадовас абун. ХIисабалде босараб проекталда рекъон гьениб харж гьабизе ккезе буго миллиардаз гIарац.
Гьеб буго кутакалда бахIарчияб, таваккалаб, жакъа дуниялалда ва метер Аллагьасда цеве бусурманчи кIодо гьавулеб гали буго. Аллагьас гIелмуги, гIакълуги, кантIиги кьейги щивав бусурманчиясе. Абула, аварагасул (с.т.гI.в) хIадис бугин нужеца гIелму тIалаб гьабейин Китаялде щвезегIан унги абураб.
Бусурманчи вукIине ккола камилав, чорхолъ витIарав, къвакIарав, бахIарчияв ва гьелдаго цадахъ гIакъилавги гIалимавги. Жакъа нилъеда Зиявудинидаса бихьулеб баркат буго лъикIаб, жиндир заманалда щвараб профессионалияб лъаялъул хIасил. Гьеб кинабго бихьарал умумуца бахъиладай жакъа цIалдолев васасухъа тIехь нахъе?
Щакаб жо буго, щай гурелъул кутакалда лъикIаб ва пайдаяб мода унеб буго жамгIияталда жаниб, репетиторал ккун лъимал цIализарулеб. ГIицIго ччорбаца данде гьабулеб жо батана цIакъго дагьаб жо буго. Дунялалъул ва ахираталъул рахъ рекъон ккезе ккани хIажалъулеб букIун буго гIаданлъигун иманги, гIаданиб нахги - халкъалъе баракат жиндаса бахъулеб. Хабар лъикIаб рагIайги.
------------------------------------------------------------------------------------------------
Эркенлъи Радиоялъул пикру авторасул пикругун дандеккечIого букIинеги рес буго.