Дагъистаналъул къуваталъул идарабаз 2015 соналъул февралалда кквезе байбихьана Дербенталда мажгитги хIалае ккун накотиказул бича-хисиялда букIараб цо къокъаялъул гIахьалчагIи. Гьез аслияб къагIидаялъ бичулеб букIун буго героин, опий ва цо-цо анашаги.
Аслияб къагIидаялъ гьел наркотикал Азербайджаналдасан рачIунел рукIун руго Дербенталде. «Эркенлъи» радиоялъухъе щварал баяназда рекъон низам цIунулез цин ккун вуго гьеб такъсирияб къокъаялде гъорлъе унев 33 сон барав Султанов Новрузбег, гьесул пишацоязда гьоркьов гьев бищунго гIолохъанав вукIун вуго. Цойгидал руго 47 ва 56 соналъул ригьалда ругел чагIи.
Гьедин бищун цеве ккурав Султановас бицун буго гьезул къокъа хIалтIулеб букIараб куц, лъие ва кигIан гьез наркотикал ричулел рукIаралали. АнцIгогIан соналъ халатбахъунеб букIун буго гьезул бизнес. Чанго моцIидасан гьесулго цойгидал пишацоявги ккуна къуваталъул идарабаз, амма гьезул цохIонигияз гьеб къокъаялъул бетIерлъун вукIарав Дадашев Ирзада хурхун кинал рукIаниги баянал кьун гьечIо.
ЦIех-рехчагIаз, цебехун рехсараб, гьеб къокъаялъул гIахьалчагIазда хадуб ххалги ккун тIатинабун буго щибаб моцIица гьез наркотикал ричун бищун дагьалдасан 500 язараго гъурущ гьабулеб букIун бугин абун. Ккуразул рокъоб чIухь баниги, цойги щаклъи бугел бакIазда халгьабуниги гьел наркотикал рахчараб бакI цин батулеб букIун гьечIо хасал идарабазда.
Къокъаялъул бетIер Дадашевасул Дербенталъул некIсияб рахъалда бугеб шигIиязул мажгиталда гьев бетIергьанаб рукъ букIин лъан буго низам цIунулезда. Гьеб рукъги мажгитгIадин хIалтIизабулеб букIун буго. Гьедин хасал хъулухъазул вакилзабаз гьеб рокъоб чIухь бан хадуб тIатинабун буго гьеб рукъ наркотикал рахчулеб бакIлъун букIараблъи. Гьеб мажгиталъе имамлъи гьабулев ГIалиев ТIагьирги вукIун вуго гьебго къокъаялъул чи.
Гьединго къуваталъул идарабазул вакилзабахъан «Эркенлъи» радиоялъухъе щварал баяназда рекъон гьеб къокъадул бетIер Дадашев Ирза цевеги жанисел ишазул системаялад хIалтIулев вукIарав чи вукIун вуго. Гьединлъидал гьес живго кквечIого вукIиналъе гIемераб хIаракат бахъун буго. Жинда хадур ФСБялъул ва наркотиказул бича-хисиялде дандечIараб идараялъул хIалтIухъаби чIун ругин, гьезие жинда хурхун провокация гьабизе къваригIун бугин абун прокуратураялде гIарзацин хъван букIун буго гьес.
Ккурал жиндирго пишацоязе лъикIал-лъикIал адвокатал ккун, гьезул хъизаназе гIарац кьун, гьез жинда тIасан баянал кьечIого рукIиналъе хIалтIи гьабулеб букIун буго.
Гьелда тIадеги Дадашевас такъсирияб къокъаялъул щивав гIахьалчиясухъаги бакIарун гIаммаб анкьго миллион гъурущ данде гьабун букIун буго, такъсирчагIаз гьединаб гIарцуда «общакилан» абула. Нагагь гьезул цонигиясул проблемаби ругони гьесие кумекалъе хIалтIизабулеб букIун буго гьеб гIарацги. Кин гьев Дадашевас полициялъухъе щвечIого вукIиналъе хIаракат бахъаниги исана марталда полициялъ ккуна гьев.
Гьеб мехалдаги адвокатасдасан ришватги кьун живго виччазавизе хIал бихьун буго гьес, амма гьелъул хIасил ккун гьечIо. Гьедин исана октябрь моцIалда цIех-рехги лъугIун диван гьабуна гьеб цебехун бицен гьабураб къокъаялъул гIахьалчагIазда тIад.
Амма гьезул бетIер Дадашев цIакъ бигьаго ворчIанин абизе бегьула, гьесде цохIо наркотикал хIалтIизариялъул ва гьел цIуниялъул гIайиб гурони гIунтIизабичIо. Гьедин диваналъ гьев лъабго соналъ туснахъ гьавизе хIукму къотIана. Гьесул пишацоязде наркотикал рича-хисиялъул, гьел цIуниялъул гIайибги гIунтIизабун 8-ялдаса бахъараб 12 соналде щвезегIан туснахъ гьаризе хIукму къотIана.
Гьев Дадашев гьедин бигьаго ворчIиялъе гIилла кканила гьесул имгIал федералияв диванчи вукIин ва гьесул гIагарлъи жанисел ишазул системаялъул хIалтIухъаби рукIинилан рикIкIунеб буго Дербенталдаса жамгIияв хIаркатчи Руслан Пейсаховас. Гьес абулеб буго жамгIияталъул ццин бахъун букIанила гьев Дадашевасе диваналъ лъабго сон гурони кьечIеб мехалда.
Гьез интернеталдаса ахIи-хIур бахъинабун республикаялъул прокурорасде хъвадарун хадуб, гьал къоязда прокуратураялъ гьеб цебехун рехсараб наркобизнесчагIазул къокъаялъул гIахьалчагIазе диваналъ къотIараб хIукмуялда тIасан гIарз хъван буго.
Руслан Пейсахов: «Диваналъ хIукму къотIун хадуб киналго руцIцIун чIун рукIана, прокуратурагиха гьединго. Гьелдаса хадуб моцI ине букIана, моцIидасан гьеб хIукму къануналда рекъон хIалтIизе лъугьине ккола, гьелда тIасан гIарзги хъван бажаруларо.
ЖамагIатчагIазда гьеб кинабго лъан хадуб гьез ахIи бахъинабуна гьедин гIарза хъвазе цIарал болжазул кIиго къо хутIараб мехалъ прокуратураялъ Дагъистаналъул тIадегIанаб диваналде гIарза хъвана гьеб Дербенталъул диваналъ Дадашевасе ва гьесул къокъаялъе къотIараб хIукмуялда тIасан.
Дадашевасде цин такъсирияб къокъа гIуцIиялъул, наркотикал ричиялъул гIайиб гIунтIизабулеб букIана, хадуб ракIалдаго гьечIого гьесда тIад цохIо нарокотикал хIалтIизариялъул ва гьел цIуниялъул гIайиб хутIана.
Дихъе щварал мухIканал гурел баяназда рекъон гьес щуго миллион кьун рагIула живго ворчIизе вукIине. Гьедин лъабго сонги кьун, гьелъул бащадаб жанибги бан, заман щвелалдего, шартI бихьизабун туснахъалъуса виччазе ракIалда букIун буго гьесда».
