«Исламияб пачалихъ» абураб экстремистияб гIуцIиялъул лидеразул цояв абу Сайаф чIваялъул хIакъалъул лъазабуна Цолъарал Штатаз. Америкаялъул спецназалъул хасаб операция тIобитIун буго Сириялъул машрикъалъул рахъалда.
ХъахIаб рукъалъ 16 маялда бахъараб лъазабиялда абулеб буго, экстремитстазде данде рейд тIобитIанин Цолъарал Штатазул президент Барак Обамал буюриялда рекъонин.
«Исламияб пачалихъ» гIуцIиялда Абу Сайафил хIаракатчилъи хурхараб букIун буго нартгун газ бахъиялда, гьелдаса пайда босиялда ва финансал хIалтIизариялда.
Reuters агентлъиялъ лъазабулеб буго, «Исламияб пачалихъ» гIуцIиялъ гъоркьлъалие росарал американиял ва цогидал улкабазул гражданал хвасар гьариялъул икъбал щвечIеб цебесеб соналъул балъгояб рагъулазул акция ракIалде босичIого, гьеб кколеб буго Америкаялъул спецназалъул тIоцебесеб хасаб операция Сириялда.
ХIинкъигьечIолъиялъул мажлисалъул вакил Бернадетт Миганица лъазабуна, ГIиракъалъул территориялдаса операция тIобитIанин ГIиракъалъул нухмалъиялъул изнуги босунин. Аммайин, жубалеб буго гьелъ, жибго Сириялъул нужмалъиялда ХъахIаб рукъалъ лъазабун букIинчIин тIобитIизесеб операциялъул хIакъалъулъин.